ألو إلسي؟
بونجورك جوزيفين
بونجورك لايدي الفن اللبناني. كلنا منقول إنك من أهم نجمات العصر الذهبي. درامتنا خسرت كتير من بريقا اليوم، والادوار الاولى ما عادت لنجوم كانوا وبعدن ساطعين.على أي أساس بتختاري دور مساند اليوم؟
انا فخورة إني بنتمي للعصر الذهبي للدراما اللبنانية بتلفزيون لبنان، وكان ممكن تمتد أكتر هالفترة لو من الحرب اللبنانية. كتار ما بيعرفوا إنو بعض المسلسلات لِ كنا نصورها بهيديك الفترة، كان يبتدي عرضا ببلد عربي قبل لبنان، قدّ ما كان في طلب على المسلسل اللبناني واحترام لإلو. للأسف الإنتاج اللبناني البحت خفّ كتير، وصارت الإضاءة على الاعمال المشتركة. مش غلط الممثل بعمر معيّن يلعب دور مساند، إذا الدور عندو قيمة فنية، متل منيرة بـ»واشرقت الشمس» اللي بفتخر فيه وبنَص منى طايع، وأخدت عنو جائزة «موريكس دور».
صحيح، قالوا دور منيرة علّم بقوة لأنو درامي وممزوج بالطرافة والجرأة. أي دور بتتمني تجسّديه اليوم؟
الأدوار التاريخية والأدبية بتأثر عالممثل وبتخليه يطلع من حالو بشكل سحري. بتذكّر مسلسل البؤساء (قصة فيكتور هوغو). المشاركة كانت من خلال دور فانتين الصغير، وكان مفروض جسّد شخصية كوزيت بنتا كمان، بس طلعت حامل بيورغو. بتمنى جسّد شخصية الاديبة اللبنانية مي زيادة لِ تقدمت بعدة اعمال، بس ما اتضوّى على كل التفاصيل والغموض اللي لف حياتها. يا ريت بيتضوّى على كل حياتها بنَص مميّز لمنى طايع مثلاً. كمان بحب جسّد شخصية الست زلفا شمعون، يمكن لأنو بمرة التقينا أنا وجورج بالرسام برنار رنّو، فقلّنا: بتعرفوا بمين بتذكروني؟ بكميل وزلفا شمعون».
قالوا ابتديتي حياتك المهنية كمذيعة. ممثلات كتار قدموا برامج حوارية. ما بتستهويكي هالفكرة؟
انا ما ابتديت كمذيعة. بلّشت صغيرة ببرامج «ماما عفاف» و»الصديقة جِنان». بتلفزيون لبنان حبّوا تمثيلي وسألوا معلّمتي إذا بقبل صير ممثلة. أهلي رفضوا وما جابولي سيرة. لما عرفت زعلت وطلعت مع معلمتي عالتلفزيون، وقلت لأهلي خلوني بس اعمل حلقة وحقق حلمي. طبعاً طلعوا معي ونطروني وقالولي» فشّيتي خلقك؟ خلص انسي الموضوع». بالتلفزيون تمسّكوا فيي، فعرضوا عليّي صير مذيعة ربط فقرات. ولمّا أهلي شافوا إنو التلفزيون صار متل بيتي، تعودوا عالفكرة وتغيّرت نظرتن إنو الأجواء الفنية «بعبع»، ووافقوا لمّا قلتلن عارضين عليي مسلسل اجتماعي وهادف «مذكرات ممرضة».
«مذكرات ممرضة» كان بداية التمثيل والحب مع جورج شلهوب. وقالوا انك من اوائل الفنانات لِ تزوجتي زواج مدني. شو رأيك انو هالزواج بعدو غير مطبّق بلبنان؟
قرار الزواج المدني عمل صدمة كبيرة لأهلي وخاصة الماما لِ عملت كريزة قلب وكان فكرا تضغط عليي لغيّر رأيي. انا كنت اقرا كتير ومتطلعة على الزواج المدني، والفكرة ما كان مستبعدة. طول عمري بحس بالثورة بداخلي، وهالثورة خلتني آخد القرار بكل جرأة. انا من المطالبين بمجتمع علماني، وكل انسان يبقى على دينو، لأنو الدين شغلة روحانية ومبادئ سامية.
جمعتك اعمال بزوجك وبابنك بالماضي. وقالوا كان في عمل جديد إلكن، بس اتوقّف.
كان في عمل سينمائي بأواخر التسعينات للكاتب أنطوان فرنسيس بيجمعنا نحنا الـ3. نص حلو بس انتاجو مكلف، فما قدروا يأمنوه. وهون بحب قول إنو رغم فخرنا بالمنتجين اللبنانيين واعمالن المميّزة، التضواية عم بتكون عالممثل العربي اكتر، وهيدي ثغرة فيها علامة استفهام. الممثل اللبناني كان pioneer بالاعمال العربية. ما بعرف ليش راح الاهتمام لغير الممثل اللبناني اللي عندو كل المقومات، ولازم ينعطاه حقو.
