هاي وسام. مشغول عم بتحقق بالقضية 2024، أو فينا نحكي؟
أكيد فينا نحكي.
قالوا راجع بدور الضابط ايمن بمسلسل 2024 برمضان. رح تتخفّى عن جديد بشخصية خيّا للضابط سما؟
ما فيني أكشف كل شي لتضلّوا متشوقين. بس بما أنو هالشخصيتين انكشفوا بالجزء الاول، يمكن ما يتخفّوا ذات الشخصية بالجزء التاني. بس اكيد رح يكون فيه كتير مفآجات ومغامرات بينن كضبّاط وبين العدو الجديد. لازم تتابعوا لتعرفوا.
رح نتابع اكيد. وعَ سيرة المغامرات، قالوا انك كنت بطل بالكونغ-فو. هالرياضة هي فلسفة بتعتمد على التكامل بين الجسد والعقل والروح. قديش فادك الكونغ فو بحياتك؟
فادني كتير وصح هو فلسفة وطريقة حياة. كل شي بيتحسن بحياتك وبيصير عندك سلام. الناس بيفكروا إنو اللي بيمارس رياضة متل الملاكمة والفنون القتالية بيكون عنيف. بالعكس تماماً، بتضهّري كل الـstress بمكان controled متل الـgym، وهالشي بيرّيح وبيعطي ثقة بالنفس بتطيّر العقل. الكونغ فو عطاني من صغري ثقة بالنفس وعلّمني المثابرة والالتزام.
ع سيرة الكونغ فو، عبالك تلعب دور اكشن وفنون قتالية بشي عمل؟
كتييير عبالي لأنو it’s so much fun. درست تمثيل بلوس انجلوس، وكان في كذا set، لانواع متل الاكشن والرعب وغيرو. الاكشن كان كتير يسلينا ويعلمنا قصص جديدة مع اختصاصيين عندن شخصية فريدة. هالقصص بيفيدوا متل ما الكونغ فو فادتني، وعلى الـset كنا كتير مننبسط، يعني الممثل بيحس حالو رايح يتسلّى مش يشتغل، مع إنو شي كتير بيتعّب.
قلت درست تمثيل واخراج باميركا، وقالوا انك درست موسيقى كمان. بحال عرض عليك تجسّد حياة مغنّي، مين بتختار؟ عبد الحليم او الفيس برسلي ؟
الفيس وعبد الحليم، سبق وجسّدوهن ممثلين رائعين، لهيك بفضّل إختار مغنّي ما حدا قدّمو قبل. مين بختار؟؟؟ صحيح هو كتير قصير وأنا طويل، بس بختار شارل ازنافور.
انشالله ما يزعل منك غسان صليبا لأنك ما اخترته. على كل حال قالوا صوتك حلو متل بيّك، وشاركت بديو المشاهير. ليش ما توجهت للغناء بشكل محترف؟
هلأ صرت حب كون بعالم الموسيقى. قبل كنت حس بضغط كبير وإنو لازم اعمل اغاني، وما كنت عم لاقي هويتي الفنية المناسبة والمختلفة عن بيّي. بميل للغربي اكتر وتمرّست فيه، مع اني بحب دخّل شوية شرقي بريبرتواري. من سنتين اخدت قرار انبسط بالموسيقى كموسيقى وإنو ما بدّي فوت عليها كبزنس. من وقتا صرت مرتاح، وصار على قلبي الذ من العسل اعمل concert، وغني أغاني لغيري. من وقت ما اخدت هالقرار صرت انبسط بالموسيقى اكتر.
قالوا انك بتنبسط كمان مع جمعية «انت اخي» . صحيح عندك خيّ بيولوجي واحد، بس يبدو بفضلن عندك اخوة كتار.
صح، ب «انت أخي» كلن اخواتي وعيلتي. شو هالعالم اللي بياخدوا العقل. بيعطوني طاقة إيجابية وفرح وتفاؤل. بيطلع الواحد لعندن ليساعد، بيطلعوا هني عم بيساعدوه.عندن فرح وايمان ومبسوطين بكل شي عندن ياه، وعندن كتير. بيخلوكي تقدّري كل شي عندك ياه ومش منتبهتيلو. «انت اخي» جمعية رائعة، وكلمة رائعة قليلة عليهن.
خلينا نختم مع العيلة كمان. قالوا انو ستّك علّمتك فلسفة مهمة.
مزبوووط، ستي ميمي الله يرحمها قالتلي ما تحط ملح بالأكل، ومن وقتا أخدتا عبرة. اصلاً كل الاشيا اللي بحبن متل dark chocolate والسيغار، اذا مش موجودين قدامي بنساهن. كتير بحب اني ما بأدمن على شي. بعتقد انو الاعتدال بحياتي بيجي بكل شي تقريباً، مش بس بالأكل.
