- مرحبا ميرنا وحمدالله عالسلامة. قالوا كنتي مسافرة للمشاركة بمسلسل عالمي.
مزبوط، شاركت بمسلسل من 5 حلقات، وكانت تجربة كتير حلوة. التصوير بعد ما انتهى، لهيك بعتذر ما بقدر اعطي اي تفاصيل عنو حالياً.
- طيب، ميرنا انت ممثلة ومخرجة، والكل قالوا انك رائدة الفيديو كليب بلبنان والعالم العربي بفترة التسعينات، واطلقتي شهرة كتير من النجوم. شو اللي ميّزك بهيداك الوقت؟
بالتسعينات ما كان في قاعدة للفيديو كليب حتى نشوف غيرنا شو عم يعمل ونتعلّم. وأصعب شي انك تحطي حجر الاساس بحيالا مشروع، وانا من اللي حطوا حجر الاساس للفيديو كليب، خصوصا انو انا وزوجي طوني ابو الياس كنا نعتمد على المؤثرات اللي بوقتا ما كانت موجودة. هلأ صار كل شي بينعمل بكبسة زر. دايماً كان عندي تطلعات ابعد من انو حط مشهدية ورا بعضا. كنت اعتبر الفيديو كليب استعراض مشهدية. كمان هو دعاية تسويقية للفنان، لهيك لازم تنعمل بشكل ملفت. حتى يبقى الكليب وما ينتسى بسرعة، كنت احرص اني ضيف قصص سبسيال، ومؤثرات. ودايما كنت ركّز على الفنان لأنو هو الاساس.
الكل بيقولوا انو الزمن اتغيّر، وكمان الفيديو كليب. راضية عنو اليوم؟
للأسف رجعنا لورا. قبل كنت اشتغل و»بحْبش» ودوّر كيف بدي اعمل effect. اليوم صار في تطبيقات وصار في بلا زغرة على تيك توك كبسة زر بتطلعلك effect معيّن. اليوم الاكترية ما بقى عم بيشغلوا راسن لحتى يطلّعوا شي ملفت ويبقى بالذاكرة. الاعمال عم بتمر مرور الكرام، واكترها بينحصر بفنان وديكورات، و لقطات ورا بعضن، بيلزقوها وبيطلّعوا شي اسمو «فيديو كليب». عصر الفيديو كليب ما تغيّر عالميا، بس بلبنان والعالم العربي في ناس عم يقضوا عليه نتيجة اعمال فاشلة.
ميرنا انتِ بعيدة اليوم عن عالم الفيديو كليب. برأيك ما في وفا بعالم الشوبيز؟
اللي بينطر وفا بعالم الشوبيز والفن، بدو ينخذل كل يوم 100 مرة. اللي بدو يعمل أي عمل بمجال الفن، لازم يعملو لنفسو ولنجاحو، ولينجّح الناس اللي معو، لأنو النجاح ما بحياتو بيكون فردي. اللي بدو يشتغل وحاطط براسو مقابل، رح يتعرّض لخيبات كتيرة، وهيدي الخيبات ما بتخليه يركّز على شغلو لأنو ناطر شي من حدا. أنا ولا مرة بنطر اشتغل لحتى اتلقى، وهيدا الدرس اتعلمتو على مدار السنين، وكنت واعية عليه من اول يوم.
- قالوا انك صاحبة طاقة كبيرة، ما بتنطفي. كيف بتحافظي عليها؟
بتمنى طاقتي ما تنطفي وانا بآمن بال positive vibes، وبحب ضل محاطة باشخاص عندن ابتسامة من القلب. اكتر شي بيزعجني هو الشخص النكدي، اللي ما بيعجبو العجب. انا بعرف استمتع باللحظة حتى لو كنت بمحل ما كتير على ذوقي، وقادرة انسجم مع أي بيئة حتى لو ما بنتمي الها. ولا مرة بتطلع عالنص الفاضي من الكباية، وانشالله ابقى هيك.
- انشالله، وانشالله تبقي طبيعية متل ما انت، لأنهم قالوا انك ما لجأتي بعد لأي تقنية تجميلية.
مزبوط، بس للصراحة من فترة عملت بوتوكس لجبيني، لأنو عندي migraine. قالولي ممكن البوتوكس يخففو، بس ما زبط معي، ومن وقتا ما رجعت عدتا. ما عندي فلسفة حول التجميل، عندي مراية وبآمن انو الانسان لازم يكون مقتنع بينو وبين نفسو انو في وقت عم يقطع، وفي شغلتين مستحيل نرجعن: الوقت والصحة. لازم نتعايش مع العمر ونحب حالنا. انا مش ضد التجميل وممكن إلجألو، بس عم شوفو حولي تشويه ومبالغة ومش تجميل. بعدين انا ممثلة، وضروري حافظ على تعابير وجي، وهالتعابير خلت القيمين على المسلسل الاجنبي يختاروني. انا بعدني بتطلع بمرايتي ومقتنعة الحمدالله.
