أمان أمان على حياتنا بلبنان. من أزمة لحرب، ومن إنفجار، لإنهيار اقتصادي، لمصاري، وأحلام صاروا بخبر كان. بس دايماً بنص قلب العتمة، في شعاع نور وفي سبب للإبتسام. دايماً بنصّ قلب تاني أوكسيد الكاربون، في فسحة أوكسيجين. لهيك شو رأيكن بهدنة؟ هدنة مع الممثلة نوال كامل، لنبعد معها شويّ عن الوضع "الدراما - تيك"، وندردش سوا عن قصص "فن - تاستيك" بحياتا.
-نوال، إنتِ شخص إيجابي والضحكة ما بتفارق وجّك عادة. كيف بتحافظي على هالإيجابية رغم كل شي عم نقطع فيه؟
صحيح اللي عم نقطع فيه شي كتير بشع، بس أنا تعوّدت دايماً ركّز على الإيجابيات الموجودة بالحياة. الحياة أهم وأكبر من بعض القصص الصعبة اللي بتقطع خلالا. أنا بقول رغم كل شي عم بيصير، الحمدالله الشمس بعدا عم تشرق، وبعدني بصحتي وقادرة أوقف على إجريي وفكّر صح وإشتغل. الحمدالله بعد في علاقات إنسانية كتير قوية بلبنان. نحنا بلبنان عايشين بأعجوبة. أصلاً كيف مستمرّين بلبنان، هيدي أكبر أعجوبة، وإيد ربّنا معنا وحاميتنا.
-صوتك حلو وبترقصي بإحترافية. بتلجأي للغناء والرقص لمّا تكون معنوياتك بالأرض، أو لشي تاني؟
لأ، بالعكس، أنا برقص وبغني لمّا كون مبسوطة ومعنوياتي عالية ومجتمعة مع الاصحاب. بس لمّا يكونوا معنوياتي قاشطين شويّ، بصلّي وبنزوي وبفكّر وبحلّل اللي صار معي لحاول لاقي مَخرج. هلأ مؤخراً عم برسم وبحس عملت "Meditation" بالرسم، وهالشي بريّحني.
-مرقتي بظروف كتير صعبة بحياتك الشخصية، متل الإغتصاب خلال فترة الحرب. لو معك جهاز تحكّم، أي حدث مؤسف بتلغيه من شريط حياتك؟
أنا واقعية وبقول لازم الانسان يقبل الواقع ويتخطاه، شو ما كان وقد ما كان صعب. ما فينا نتجاهلو ونعيش إنفصام بالشخصية. أكيد كنت بتمنّى قصص كتيرة ما تصير معي، بس صارت، لهيك ما بحاول إمحيها. تعلّمت ونضجت بسببها. لو معي جهاز تحكّم، بلغي الحرب اللي خلّت الناس تفقد إنسانيتها. الحرب أكتر شي بكرهو، أكتر حتى من مشاكلي الشخصية، لأنها كانت السبب بتغيير ذهنية الناس وخلّتن يصيروا شوي متطرفين، والحكّام عنّا استغلوا شعبنا ليغرّقوه أكتر بالتطرّف والكره.
-طيّب مين الشخص "الفنتاستيك" اللي بفضلو صارت حياتك أحسن؟
كل شخص كان صادق معي وبيقلّي كلمة حق، حتى لو أوقات الكلمة بتزعج وبتصدم، بعتبرو "فنتاستيك". لأنو الشخص الصادق بيساعدني حسّن حياتي وآخد قرارات أوعى.
-اشتغلتي مسرح مع فنانين كبار متل منصور وزياد الرحباني وصباح ونبيه ابو الحسن. شو الشي "الفنتاستيك" اللي تعلّمتيه من كل شخص منهم ؟
تعلّمت منهم كتير قصص "فنتاستيك". مثلاً زياد الرحباني منعتبرو كلّنا فنان عظيم ومُبدع بالموسيقى والكتابة والمسرح، هوّي بالواقع شخص كتير طبيعي ومتواضع، وما كان ينبسط إذا قلنالو "إستاذ" أو أي لقب تاني. تعلّمت منو إنو الانسان قد ما كبر لازم ما يتكبّر على غيرو. صباح هيي "الفنتاستيك" بحدّ ذاتها. مهضومة كتير وعندا ذاكرة رهيبة، وضحكة بتعديكي إيجابية، وأهمّ شي ما بتجيب سيرة حدا بالعاطل. نبيه أبو الحسن اشتغلت معو مسرحية وحدة ببداياتي، وتعلّمت منّو غار على شغلي وإلتزم بدَوْري للآخر. إستاذ منصور هوّي الثقافة بحدّ ذاتها. للأسف اليوم الناس كلّها بتنغَرّ وبتفكّر إنها بتعرف كل شي، بينما هالفنانين اللّي ذكرتيهن، قديش بيعرفوا وقديش هنّي "فنتاستيك" بكل معنى الكلمة، وقديش بتجمعن روح النكتة والفكاهة، رغم هيك كانوا يضلّوا يبحثوا ليطوّروا حالهن.
-قدمتي كمان أعمال عديدة بالتلفزيون، تركوا بصمة بذاكرة الناس، وفزتي بجائزة "موركس دور" عن دورك بـ "للموت 2" و "دور العمر". أي دور إنتِ شخصياً بتعتبريه فنتاستيك بمسيرتك؟
قدّمت كتير أدوار حلوة، بس في أدوار عندا نكهة مختلفة وخاصةً بالنسبة إلي، متل دَور سُهيلة بمسلسل "خمسة ونص"، و شهيرة بـ "للموت 2" ودَوري بـ "دور العمر". أخيراً الدور "الفنتاستيك" كان الحجّة رجاء بـ "ع أمل" ، والناس كتير حبّوا هالشخصية اللي كان فيها تحدّي بالنسبة إلي لأنها بعيدة شوي عن بيئتي ومعتقداتي.
-للأسف الممثلة بلبنان، بعد عمر معيّن، ما بتتقدملا أدوار أساسية وبطولات، متل بأميركا و مصر. خلّينا نكون متفاءلين ونقول بحال الوضع تغيّر، أي دور البطولة بتحلمي تقدّميه اليوم؟
بحسّ عندي طاقة ومقدرة بالتمثيل بعد ما بيّنوا متل ما لازم بالتلفزيون. أنا بنت مسرح، وللأسف في منتجين ومخرجين وكتّاب بعد ما شافوا كل قدراتي. إذا في مجال لدَوْر بطولة، بتمنّى دَور يخلّيني كون هالقدّ حرّة بالأداء وإتمتّع بالتمثيل. دَور بيحاكي المرأة ونفسيّتها وعمقها.
-مين الممثل اللي بتتمنّي تمثّلي قدّامو وبتحسّي ممكن تشرقطي معو؟
كلّ ممثل عندو شغف التمثيل بحسّ ممكن شرقط معو، لأنو التمثيل متل لعبة "بينغ بونغ". في كتير ممثلين بلبنان بحب إشتغل معهن، بس ما بعرف إذا بيناسبوني أو بيلبقولي بعد وأنا بهالعمر، متل يورغو شلهوب ويوسف الخال، يقبروني. عالمياً، بتمنّى مثّل قدام جاك نيكولسون وروبرت دي نيرو (يخرب بيْتو قدّ ما كبر بيضلّ قبضاي!)، وبحب أنطونيو بانديراس، ياااي... بس ما تحطّيها هيدي الياي.
-رح حطّا لأنها مهضومة. طيّب على شو بتقولي "ياي" بلبنان، رغم ال "آي" اللي فيه؟
اذا بدي إحكي عن لبنان بتروح معنا لبكرا. كل شي فيه بحبّو، ما عدا الجُوَر عالطريق. كل شي بلبنان إستثنائي و "فنتاستيك" من طبيعتو الرائعة وقِدَمو التاريخي. بحبّ التناقضات اللي فيه وبحب ساحات الضيعة والإلفة ولمّة الناس وحبّن للحياة وقلبن الطيّب اللي خلّى الزعما يحتالوا عليهن ويوجّهوهن لقصص بمصلحة الزعيم بس. لبنان هويتي وهوّي مبارك وبعد فيه ناس بيصلّوا. بلبنان ما ممكن تجوعي، لأنّو الأرض كريمة والناس بتساعد بعضا. هالبلد إستثنائي، بس لو الله بيبعتلو حكّام نفسن كبيرة وعندن كرامة وبيشتغلوا لمصلحتو وبيعرفوا يديروه وبآمنوا بالحرية والسيادة.
