جوزيفين حبشي

ألو… فيروز؟ بتطلعي مع ماكرون عند الرئيس عون؟

ألو، كحلون، فيروزتنا؟

صبّحِك بالخير يا فيروز. عرفتي مين وصل علبنان؟ مزبوط، صديقك ماكرون…



شو؟ طبعاً رح يمرق صوبك، بعد ناقص فيروزتنا تقلّه تعا وما يجي. بس بالأول رح يقطع عقصر بعبدا ليهنّي الرئيس عون.. شو؟؟ لأ ، عون مش راجع، وحده لبنان راجع يتعمّر وأخضر حلو مع الرئيس الجديد… مزبوط، كيف ساقبت تنيناتن كانوا ظبّاط، واسمن كمان… ظابط.



يلا، اندهي لريما ريما الحندقة وبلّشوا تحضيرات. ابعتيها عالدكان تجبلك شمع احمر، وأول ما يوصل لعندك ماكرون، استقبليه بـ "أهلا وسهلا نورت الدار والشمع الأحمر يضحك للنار".


وبتعرفي شو لازم تخليه يحضر؟ لأ يا فيروز، مش مسرحية "صح النوم". المسرحية طويلة ومش حلوة تقوليلو "سهار بعد سهار" لتخلص المسرحية ويحرز المشوار. مش حلوة ولا مأنوسة يطوّل ماكرون عندك انتي وريما، انتو تنيناتكن تحت نصيبكن ، وبكرا بتوعي على إشاعات، ومين قدّك بيعرف قديش "بيلفّقوا أخبار".



لنرجع لموضوعنا، لازم تحضّريه للرئيس الفرنسي نشرة اخبار تلفزيون لبنان باللغة الفرنسية. ولِك إيه إيه، رجعت رجعت، متل ما لبنان عم يرجع.



وبتعرفي شو ست فيروز؟ بدل ما تستقبليه بالشمع الاحمر، استقبليه بأغنية مناسبة اكتر للمرحلة: "طلعنا على الضو، طلعنا على الريح، طلعنا على الشمس، طلعنا على الحرّية…".



شو بدّك تضيفيه؟؟ لأ، مش زوفا وملّيسا. هالمرة لازم تفتحي قنينة شمبانيا على شرفه وعلى شرف "لبنان الحقيقي" اللي جايي، تَ يشيل الوجوه المصبوغة،الوعود المدموغة، وياخدهن الشّتي.



يييي، خطرتلي فكرة حلوة كتير، شو رأيك بدل ما تستقبلي ماكرون عندك بالبيت، ويطلّعوا عليكي اخبار، تطلعي معه ع قصر بعبدا تهنّي الرئيس؟ صدقيني بيلبقلو هالرئيس اللي جايبلنا معو سلام، تزورو وتباركلو فيروز . يلا بسرعة اندهي لريما، ريما الحندقة حتى تبعتلك الفستان اللي لبستيه بمسرحية بترا عالتنضيف، إذا هو رئيس، انتي ملكة يا فيروزتنا.


شو بدك تهديه للرئيس؟ صوتك احلى هديّة. غنيله:


"يا قائد السيف اللامع

من صخب المعارك راجع

يا ملك النصر يا سيد الفرسان

شبهتك بحقلة زيتون

شبهتك بعجلون

بالتلج الأبيض على حرمون

بأرزة من لبنان".