شهر رمضان هلّ هلالو، والليلة بتهلّ علينا المسلسلات الرمضانية، وأبرزها وأكترها إنتظاراً "على أحرّ من جمر" بالنسبة لكلّ عشاق الدراما اللبنانية، مسلسل "بالدم" عل "mtv". من خلال هالمسلسل، قرّرت شركة "إيغل فيلمز" تحارب "بالروح وبالدم" كرمال درامتنا… روح المسلسل ودمّو ونبضو الأول، هيّي الكاتبة "الفنتاستيك" ندين جابر .
- "بالدم" دم لبناني صافي %100، من إنتاج وكتابة وإخراج وتمثيل .قديش مهمّة هالخطوة على صعيد الدراما اللبنانية ككل؟
مهمّة كتير أكيد، لأن الدراما اللبنانية صرلا فترة عم بتعاني بظل الأوضاع الإقتصادية وكل المصاعب اللي مرق فيها بالبلد. صرلنا زمان ما شفنا دراما لبنانية بحت قادرة تخرق العالم العربي وتترك بصمة. بإذن الله، يا رب هالخطوة تفتح الباب مجدداً للدراما اللبنانية.
- قدّيش بتحمّلك هالخطوة مسؤولية لأنك إنتي أم هالمسلسل؟
المسؤولية كتير كبيرة عليّي وعلى كل فريق العمل، لأن نجاح المسلسل بيقدر بإذن الله يرجّع وهج الدراما اللبنانية اللي كانت طول عمرها رائدة. نحنا كفريق عمل كلّنا عملنا اللي علينا، والتوفيق بالنهاية من عند الله. يا رب يكون هالمسلسل فاتحة خير لعودة الدراما اللبنانية للمنافسة مجدداً.
- هيدا أملنا كلّنا. وعَ سيرة الأمل، بِـ "ع أمل" بكينا كتير. هل في أمل ما نبكي دم بمسلسل "بالدم"؟
ما بوعدك، لأ. بالنهاية مسلسل "بالدم" درامي ، بِعالج قضايا عديدة متل تجارة الاطفال وغيرا كتير. يعني حامل وجع كتار ناس عندن ذات هالقضايا. لهيك، لا بدّ من البكي، أكيد.
-طيب، رح تبكّينا يعني. بس بِـ "صالون زهرة"، قدّمتي نَفَس كوميدي ولا أهضم. ماغي بو غصن من أهضم الممثلات والكوميديا بتلبقلا. ما في شي مشروع "فنتاستيك" من هالنوع قريباً؟
أنا بحبّ الكوميديا عَ فكرة، وممكن، ليش لأ. صراحة أنا بعدني شي خالصة كتابة "بالدم"، وعم باخد استراحة، ومش عارفة شو هيّي الخطوة التانية، بس أكيد رح إرجع أعمل شي كوميدي، إذا مش هلأ، بعدين.
- بمسلسل" بالدم"، العيلة هي الاساس. إنتي صرتي من عيلة "إيغل فيلمز". شو المميّزات "الفنتاستيك" اللي لقيتيها مع هالشركة، وخلّتك ترتاحي وتبدعي أكتر بشغلك ؟
مزبوط، علاقتي بـ "إيغل" علاقة عيلة ومش مجرّد كاتبة بشركة إنتاج. هالشركة بتعطيني صلاحيات ، يمكن غير شركات ما بيعطوها لكاتب، وهالشي كتير بريّحني لأنو أنا ما بحب سلّم ورقي وأمشي، وشو ما ينعَمَل بالمسلسل، ينعَمَل. "إيغل فيلمز" بتخلّيني كون مشاركة بكل شي متعلّق بالمسلسل، إن كان بالاعلانات الترويجية أو"التيزرات" والأغاني. وبعد أكتر من هيك، الشغلة اللي أكتر شي بيطلبها الكاتب هي إحترام نَصّو، و "إيغل فيلمز" من أكتر الشركات اللي بتحترم نَصّ الكاتب، ما بتلعب ولا بتلغي شي بالنص من دون ما تاخد رأي الكاتب وتخلّيه هوّي ياخد القرار. ما في شي بينعمل من ورا ضهر الكاتب، والكاتب شو بدّو أكتر من هيك؟
- عالجتي بمسلسلاتك قضايا المرأة والعيلة والحب والخيانة وآفات المجتمع. أي موضوع "فنتاستيك" بتقولي إلا ما إطرحو بيوم من الايام؟
طرحت قضايا كتير بمسلسلاتي، ورح ضل قول يا ريت فيني إحكي عن كلّ شي، لأنو أوقات في ضوابط معيّنة بمجتمعاتنا ومن المنصّات والتلفزيونات، ما بيسمحوا نحكي بإشيا موجودة كتير بالحياة وتُعتبر"تابويات" (محرّمات). ما فيني عدّدلك ياهن لأنهن كتار. لهيك بقول "عَ أمل" شي نهار نكسر كل هالتابويات ونصير نقدر نحكي عن كل شي عبالنا نحكيه.
- قلتي مرّة، "إذا أنا أم سلسلة "للموت"، فيليب أسمر هوّي بيّو" . عادةً العلاقة بين الكاتب والمخرج مش دايماً بتكون مثالية، بس إنتو كسرتو القاعدة. شو سر العلاقة "الفنتاستيك" بينتاكن؟
لازم العلاقة بين الكاتب والمخرج تكون جدّاً مثالية لأنو تنيناتن عم يخلقوا هالمسلسل. إذا كل واحد بمحل، رح يبيّن بالعمل. أنا وفيليب بتجمعنا صداقة قديمة، وبالشغل دغري منفهم على بعض. مناخد ومنعطي كتير، منتشارك بكلّ الأمور، وما حدا منّا بيعمل شي، التاني ما بدّو ياه. بشبّه علاقتنا بالعلاقة الزوجية لأنو نحنا أم و بيّ المسلسل. ما في "أنا كلمتي بدّا تمشي"، في تناغم وإتفاق، وإلا بيتأثروا أولادنا، وأولادنا هنّي مسلسلاتنا.
- بس إنتي دارسة إخراج. وما حدا ممكن يخرج نصّك أفضل منك. أيمتى ممكن تحقّقي هالخطوة؟
هالفكرة بعيدة شوي هلّأ، وممكن شي نهار تصير، بس مش بالقريب العاجل، لأن الإخراج بدّو وقت كتير وبُعد عن البيت والعيلة. إذا بدّا تصير، ممكن بمسلسل قصير، 4 أو 6 حلقات.
- طيّب، الإخراج مأجّل شوي لصالح الكتابة. أصلاَ الجمهور والنقّاد صار عندن ثقة مطلقة بنصوصك. برأيك شو نقطة قوتك ككاتبة؟
هنّي كذا نقطة، مفروض يكونوا موجودين عند كل كاتب. بدايةً الموهبة، وبعدين دراسة كتابة السيناريو والشخصيات وكيفية تطوير كل شخصية، والأبحاث اللي بعملها عن الشخصيات والقصة، والمعالجة الدرامية والكتابة يلّي بتاخد وقتا، لأنو السلق والسرعة بالكتابة مش شي صحّي. لازم الكاتب ياخد وقتو ويفكّر شهر شهرين بالفكرة، ويركّب الشخصيات ويعيش معهن، قبل ما يكتب أول حرف من أول حلقة. كل هالقصص بتعمل من حيّلا كاتب، كاتب قوي.
- أخيراً، خلّينا نحلم إنو سيناريواتك اللي غزت العالم العربي، وصلت على هوليوود. مين النجم العالمي اللي بتحبّي يمثّل نصّك؟
أوف، حلو هالحلم. أخدتيني لمحلّ إنو أنا صرت عالمية وبدّي اكتب فيلم لنجم عالمي. مين بختار؟ الممثلة الفرنسية ماريون كوتيار اللي قدّمت دور إديت بياف، لأنها ممثّلة رائعة، وبتعقّد.
