Allo وقالوا مع رندة كعدي

- ألو رندة، مشغولة أو فيني قلّك شو قالوا؟

- أهلين زوزو، خير شو قالوا؟

- قالوا ما بيلبقلك غير دور الأم لأنك أبدعتي فيه، لدرجة إنو الكل بينادولك ماما، مش بس بناتك بيترا وتمارا. راضية يحصروكي بهالدور؟

- بفهم يقولوا هيك لأني ما تركت شخصية أم ما لعبتا، وزدتلا تفاصيل مش مكتوبة. بس مين قلّن ما بيلبقلي غير دور؟ أنا درست التمثيل عن شغف حتى صير ممثلة شاملة، مش ليحصروني بدور الماما.

- قالوا مشهد حنان والهلوسة من أجرأ مشاهدك. ليش ما منشوفك بنوعية مختلفة طالما برهنتي إنك قدّا؟

- آه يا حنان. حنان هي من اجمل الشخصيات لِ لعبتا بحياتي لأن حِمّلتا كل شي كان عبالي يطلع لبرا. حنان عاشقة وأنا كنت ناطرة العب هالدور حتى لو كبيرة بالعمر، لأن الحب ما إلو عمر. حنان حلم تحقق، وقدرت بيّن كيف بيكون العشق عالسكت وبخجل. لما أخدِت حبة الهلوسة، ضَهَرِت من حالا، وفجّرت كل المخزون المكبوت عندا وعند رندة كمان. هيك شخصيات قادرة تطلع من حالا من دون هلوسة، أنا ناطرتها مناطرة، لأنو خلص ماما. أنا اعطيت هالدور كل شي.

- قالوا الأحمر لونك المفضل. اللون جريء، وإنتي أيمتى بتكوني جريئة؟

- مزبوط أنا كتير بحب الاحمر، وبيتي كلو هاللون، وإذا جيتي لعندي عزحلة بتبهرقي. الأحمر هو الحرية والحياة والدفى والحب والجرأة وبيظهر عندي عالمسرح. على خشبتو بقدر فرجي الجرأة والصخب والثورة بشخصيتي، وإكسر إطار الأم بأدوار جريئة متل "القفص" و"صوته". حلمي إحمل شالي الأحمر وفوت عالسينما بأدوار غير متوقعة. وقبل ما ننتقل لـ"قالوا جديدة" فيني أنا قول شي للمنتجين؟

-أكيد فيكي.

- بدّي قلّن ليش ما بيقدّموا بطولات لشخصيات كبيرة بالعمر؟ بمصر بعدن هالنجوم مطلوبين، والأعمال بتنكتبلن. خليهن عنا يجرّبوا لما النضج والخبرة يلعبوا، كيف بتكون النتيجة.

- النتيجة مضمونة يا "ميريل ستريب لبنان". هيك قالوا عنك، بس إنتي متواضعة وبتخجلي تطالبي بحقك المنصف لمكانتك. ليش؟

- مش قصة خجل، بس بالاول كانت النقابة هي اللي بتوضع التصنيف والتسعيرة لكل فنان. ونحنا كنا نتكل إنو المنتج بيعرف قيمتنا المادية والمعنوية. اليوم ضاعت الطاسة. بتأمل ترجع النقابة وقوانين العمل لترجع حقوقنا، لأنو نحنا منتعب ومننطر ساعات طويلة خلال التصوير. إذا المنتج ما بيقَدِّر مكانة الفنان، يعني خلص الحكي.

- ودردشتنا خلصت، مع إنو ما بينشبع منك رنودة.

• رندة كعدي