طالع عَ بالو يروح عا... حالو
خْيالو رمل
عم يلمع قْبالو
والبحر حابب
عا خيالو يستريح
مرّہ مشي عَ المَيّ
هوّي والمسيح
واليوم عا بالو
يمشي على خْيالو...
فاق الصبح بكّير
نادى عَ موجه
تْحطّ موسيقى
ندْهت لَ لِعْصافير
تَ تْغطّ بدْقيقه...
نادى على بستان
بيحبّو كتير
يبعت عَ إيد النهر
ترويقه...
آخد معو عالبحر
كرسة مَيّ
لاقح عَ كتفو
منشفه من الفَيّ
بيغطّ أصبـــــع مَيّ بالمَيّات
خايف تكون المَيّ
سقعه شْويّ...
عالموج صرلو
من الصبح مشلوح
يسمع غناني الريح
عالسكّيْت
والموج يدهنلو عَ ضهرو زيت
والشمس عم تغرق
عَ آخر روح
عالبيت كيف البحر بدّو يروح
عمرو البحر
ما كان عندو بيت...
