ألو ندين؟ ما كون عم بزعجك؟ بعرف إنك عم تكتبي شي جديد.
أولاً، إنتي ما بتزعجيني، وتانياً صح، عم بكتب مسلسل اجتماعي لرمضان، بعيد عن أجواء للموت.
طيب طالما ما بزعجك، فيني إزعجك تمرقيلي رؤوس أقلام عن المسلسل، وبوعدك ما إفتح تمي… بس بكتب.
أوكي أنا وافقت، ورح خبرك القصة من أولها لآخرها وبالتفاصيل. بس المشكلة بدّنا شي أربع ساعات، ومتل ما قلتيلي دردشتنا سريعة، وعمود الجريدة ما رح يساع، ما هيك؟
قالوا عنك حربوقة وذكية وأنا ببصملن بال 10. طيب إنسي المسلسل، قالوا ما كنتي موافقة تعملي تكملة ل للموت3. ليش؟ وليش غيّرتي رأيك؟
بعد عرض الحلقة الاخيرة، شفت تفاعل الجمهور وحسّيت النهاية كانت محبطة إلهن لأنها مفتوحة. الناس تعلقوا بسحر وريم وبيهمن يعرفوا شو صار فيهن. حسيت من واجبي اختم القصة، حتى لو بمسلسل قصير. لهيك غيّرت رأيي بالنيّة، يعني ما كان في نيّة، وهلأ صار في نيّة. بس حالياً أنا مشغولة بالمسلسل الجديد، وبعد رمضان اذا لقيت حبكة مناسبة لنهاية للموت من كم حلقة، منكون نحن لها. وإذا لأ، بيكون ما في تكملة.
مني وعليي أنا قلتلك لازم تكمّلي للموت، بس غيْري قال إنو صعب تقدري تكرري نجاحو. برأيك لِ بيطلع معو حبكة متل للموت، ممكن ينخاف عليه؟
هني قالوا الجزء 2 و3 مش رح ينجَحوا، ونجحوا. طبعاً النجاح من عند الله، وأنا عليي إشتغل بضمير وشغف. نجاح كبير متل للموت يمكن بيجي مرة بالعمر ويمكن أكتر. أنا رح أعمل جهدي لقدّم عمل ما بيقل أهمية عن "للموت"، والباقي على الله والجمهور بيحدد إذا العمل ناجح أو لأ.
قالوا كمان إنو هيفا وهبي ممكن تشارك ب للموت 4. إنتي شو بتقولي؟
انا بقول "يا ريت" مع إنو الخبرية مش صحيحة. عَ كل حال أنا بتمنى إشتغل مع هيفا، للموت أو غير للموت، لأنها بالنسبة إلي ممثلة بارعة جداً.
أخيراً، قالوا بتنامي بالنهار وبتكتبي بالليل. كيفو جوزك؟
مين جوزي؟ أنا مجوّزة؟ أنا نسيت إني مجوّزة أصلاً، ويمكن جوزي طلّقني... عم بمزح، بس قصة النوم بالنهار والكتابة بالليل مزبوطة، وجوزي شخص كتير متفهم لطبيعة شغلي، وبيدعمني لأقصى حد. لولا مساعدتو إلي مع إبننا داني، كان صعب كتير عليي ركّز وكفّي.
طيب، بيكفّي حكي، رح إتركك تركزي لتخلّصي جديدك، حتى تتفرغي للموت 4.
