بذكُر قبل مَ تْصير بالْألوان
بالْبيت كنّا نسهر حْواليْك…
وْبيّي اللي جايي مْنِ الشغل تعبان
قبل الْعشا ياكل… «الدنيا هَيْك»…
بذكُر بو ملحم حامل الفنجان
وْبعدو بِ بالي أسعد النعسان
وْشُ زْعِلْت لمّا صار إسمو دْوَيْك…
بْقِلّك قبل مَ تروح عَ النسيان
وْتطفي الشاشه وينطفو عينيْك:
كنت الحلو… ولبنان متلك كان
إسمَك عَ إسمو… وْحاملو عا دَيْك
بْحبَّك أنا… وعْليك مش زعلان
يمكن كتر مَ بْكيت عا لبنان
ما ضَلّ عندي دْموع إبكي عْليْك…
