مرحبا سمير، وألف مبروك فيلمك الجديد «حسن المصري» لِ تصوّر بين لبنان ومصر، واللي رح يبتدي عرضو بالصالات اللبنانية بـ 12 تشرين الأول.
شكراً جوزيفين، الله يبارك بعمرك.
قالوا فيلم «حسن المصري» من إنتاج شركة أفلام مصر العالمية، تماماً متل «دخان بلا نار» و»سيدة القصر». شو سرّ إعجاب المخرج الراحل يوسف شاهين فيك، وإصرار ابن إختو المنتج غابي خوري على متابعة التعامل معك؟
مزبوط، شركة «أفلام مصر العالمية» أنتجولي لليوم 3 أفلام، ومبدئياً هلأ عم نشتغل عالفيلم الرابع، انشالله. ما بقدر أعطي تفاصيل عنو لأنو بعدنا بمرحلة كتابة السيناريو. العلاقة مع الشركة مبنيّة على الثقة المتبادلة بيني وبين المنتج غابي خوري، وعرّاب هالعلاقة هو أكيد المخرج العالمي الراحل يوسف شاهين، من لمّا شاف فيلمي «الإعصار» وأبدى إعجابو فيه، ورغبتو بالتعامل معي. شركة «افلام مصر العالمية» بتحسيها عيلة أسّسها يوسف شاهين، ومستمرة مع غابي خوري، وأنا بحسّ حالي فرد من أفراد هيدي العيلة.
مش بحاجة حدا يقول إنك بتحب السينما، لأنو هيدا أمر معروف عنك. طيب ليش ما عم منشوفك أكتر ورا الكاميرا السينمائية؟
أنا بعشق السينما، وأنا سينمائي قبل أي شي تاني. وحتى لمّا إشتغل بالتلفزيون، بحاول وظّف اللغة السينمائية بالدراما التلفزيونية. بس للأسف بلبنان الإنتاج السينمائي كتير ضئيل، لهيك ما في كتير فرص، وإلا أنا بتمنى كل سنة أعمل فيلم أكيد.
رغم عشقك السينما، كلنا منقول إنك من أهم مخرجي الدراما التلفزيونية كمان. ليش إلك فترة غايب عن الاعمال المشتركة لشركات متل «ايغل فيلمز» و»الصبّاح»؟
أنا سبق وتعاملت مع شركة «ايغل فيلمز» من خلال 4 مسلسلات (اسود، الشقيقتان، ثواني وورد جوري)، بس بعد ما صار مجال إشتغل مع شركة «الصبّاح». أصلاً إنتِ بتعرفي وضع الإنتاج بلبنان، وهيدا السؤال يُسأل للشركتين.
قالوا كمان إنك دايماً بتراهن على الحصان الرابح بالتمثيل. من بعد ديامان بو عبود وريتا حايك اللي برزوا بأعمالك ووصلوا للعالمية، اليوم ستيفاني عطالله عم تبرز عربياً مع مسلسل «كريستال». هل في وجه تمثيلي جديد ممكن تراهن على نجوميته قريباً؟
صحيح، كل لِ راهنت عليهم صاروا نجوم، بس الفضل مش لإلي. الفضل إلهم لأنهم موهوبين، وأنا قدرت شوف موهبتن عَ بكير. حالياً في مواهب كتيرة، ممكن يطلع منها نجم أو نجمة جداد. يلا انشالله بعمل قريباً منكتشف نجم جديد. مع إنو أنا ما بحب استعمل كلمة نجم. المواهب لِ راهنت عليهم طلعوا ممثلين رائعين، ومش بالضرورة يكونوا نجوم. ما بحب كلمة نجم.
بس بتحب تظهر دايماً بلقطة بأعمالك متل المخرج العالمي الفرد هيتشكوك. هيك كلنا منقول. شو السبب؟
يا ريت بعرف ليش هيتشكوك كان يحب يصوّر حالو بلقطة بأفلامو، كنت يمكن بقول ذات الشي. بالحقيقة أنا كمان ما بعرف عالمظبوط ليش أخدت هالقرار، بس ممكن يكون متل توقيع إلي، أو إنو ظهوري بيعني أنا بتحمّل مسؤولية نجاح أو فشل هالعمل. بتحمّل المسؤولية شخصياً وبشكل كامل، وبشيلا عن أي حدا تاني مشارك بالعمل.
