ألو، مرحبا سيف البحر. اسمحلي اندهلك بهاللقب، لأنو قالوا انو اشهر واحب لقب عندك.
أكيد، «سيف البحر» أحبّ لقب عندي، لأنو هو دوري بمسرحية « صيف 840» الشهيرة. هالدور اخد كتير تفاعل عند الناس، وحبّوه لأنو «سيف البحر» كان ثائر ومناضل وبالنهاية بيضحّي بحياتو. الكل بيعرف المسرحية، من الكبير للصغير، وكل اللي حضرها عالمسرح أو شافها عالتلفزيون او فيديو، بيعرف قديش قيمتها كبيرة.
عَ سيرة المسرح، قالوا إنك نجم مسرح منصور الرحباني، وقدمت معه اهم الاعمال. ممكن هالالتزام بالمسرح يكون سيف ذو حدين؟
المسرح ممكن يحدّ من انتشار الفنان، لأنو إلتزام وخيار صعب، بس هو الخيار الأجمل فنيّاً بالنسبة إلي. وهيدا المقصود يمكن بالحدّ التاني من السيف. المسرح بيخفف شوي من الانتشار اللي بتوفرو الأغنية المصوّرة أو الاطلالات بالحفلات والمهرجانات اللبنانية والعربية. المسرح صحيح بيحصرك بمكان واحد، بس انا أبداً مش ندمان على خياري، لأنو المسرح شي عظيم و»أب الفنون». المسرح اللي انا اشتغلت فيه، مش بس ترفيهي، هو بيحاكي الفكر وبيطرح قضايا الانسان والوطن كمان، ولهيك هو المفضّل عندي.
قالوا كمان انو «سيف البحر» كان لقبو ببداياتو خوليو العرب. كيف خلق هاللقب، وشو سببو؟ الوسامة أو الصوت الرومنسي؟
لقب «خوليو العرب» طلع بمقالة لرئيس تحرير مجلة الشبكة، الاستاذ الراحل جورج ابراهيم الخوري. عِمِل يومها مقارنة بين الفنان اللبناني والفنان العالمي، وقال إنو نحنا عنا نفس الإمكانات من ناحية الموهبة والحضور والشكل والشخصية، بس هني بيملكوا امكانات اعلامية ودعاية اكتر منّا، وبالتالي انتشار اكبر واوسع. ومن هون طلع لقب «خوليو العرب».
طيب انت بتحب خوليو؟ وهل شي مرة غنّيت اغنية من أغنياتو؟
ايه، بحبو، وبفترة التمانينات كنت كتير حب أغانيه، بس لأ، ما غنّيتلو ولا مرة.
ع سيرة خوليو كمان، قالوا إنو كان «زير نساء»، يعني عكس خوليو العرب. المعروف عنك علاقتك المتينة والقوية بزوجتك تيري. كيف ممكن يصمد الحب كل هالسنين؟
هلأ طبيعي كل الشباب بيمرقوا بالبداية بعلاقات متعددة، ولكن بس يختاروا شريكة حياتن ويصير في التزام، بتصير العلاقة مبنية على الثقة والاحترام. هول أهم شغلتين لنجاح العلاقة واستمراريتها، والقصص التانية بتجي بعدين. وبعدين الانسان بينضج مع الوقت، وكل القصص اللي كان يتوقف عندا بعمر معيّن، بتصير ثانوية، وما بيبقى غير الأهم.
قالوا كمان انك مش بس مطرب استثنائي، كمان ممثل جيد عالمسرح وبالدراما التلفزيونية. اي دور تمثيلي بالدراما بتعتبرو الأهم؟ وهل عندك مشاريع جديدة؟
بالدراما ما عندي غير مسلسلين تنين بس، بس المسلسل اللي بعتزّ فيه كتير هو «واشرقت الشمس». بحسّ الفنان اللي جايي من خلفية مسرحية، وعندو متلي تاريخ بالمسرح الغنائي، بتهون عليه مسألة الكاميرا والتلفزيون والسينما. بس إنتي بتعرفي إنو موضوع الكتابة كتير اساسي بالنسبة إلي، والنص لازم يكون عظيم ومهم، ولازم تكتمل العوامل كلها، بين نص وإنتاج وإخراج، لحتى يتقدم عمل بيليق بمستوى الفنان والجمهور بذات الوقت.
اخيراً، قالوا فرخ البط عوام. ابنك وسام متلك ممثل، ومتل ما انت ابتديت بعالم الغناء مع استديو الفن، هو كمان اشترك بـ»ديو المشاهير». هل بتشجعه يتفرغ للغناء؟
وسام بيفضّل التمثيل. أكيد هو بيملك صوت حلو، وبيغني عربي واجنبي، واصلاً ولادي التنين بيميلوا للأجنبي لأنو عاشوا برّا 8 سنين. بس وسام بيعتبر التمثيل أولوية، والغناء مجرد هواية مش أكتر.
