جوزيفين حبشي

Allo وقالوا... مع ماريلين نعمان

23 كانون الأول 2023

02 : 04

- بونجور ماريلين وميلاد مجيد.

- بونجورك بونجور جوزيفين وjoyeux Noel.

- قالوا انك شاركتي بالحفل الميلادي shining stars of hope اللي بيروح ريعو لدعم فنانين بحاجة للفتة وفا. كيف كانت هالمشاركة؟

- كتير حلوة ومهمة إلي شخصياً، لأنو بالرغم من العجز اللي عم حسّو من ورا كل شي عم بيصير lately، حسّيت إني وظفت صوتي بالمكان الصح وللسبب الصح، وكتير مبسوطة اني تعرّفت على كل الفنانين اللي شاركت معن بهالحفل.

- ع سيرة هالحفل، قالوا صوتك حلو متلك، وشاركتي ب the voice فرنسا، بس توجهتي للتمثيل ب «للموت 3». ما بتخافي تلاقي مصير معظم الفنانين اللبنانيين بظل غياب الدولة والضمان الصحي والاجتماعي؟

- صحيح شاركت ب the voice فرنسا، وعملت «للموت٣»، وساقبت نزلوا بذات الوقت، بس أنا كنت مبلّشي الموسيقى والتمثيل من قبل، لهيك مش مزبوط انو من بعد the voice قررت اتوجه للتمثيل. انا بحب التنيْن كتير، وعَ قدّ ما قادرة نظّم وقتي لأعمل هالشغلتين اللي بحبن كتير، رح ضل اعملن. وردّاً على سؤالك حول اذا بخاف لاقي مصير الفنانين اللبنانيي بظل غياب الدولة، اكيد بخاف، بس كأنو هلأ كل تاريخ لبنان قدام عيوننا نحنا الجيل الجديد تَ نفكّر كيف نحمي حالنا بالطرق المنعطاية إلنا.

- طيب بما انو نحنا بالميلاد، والميلاد عيد الامل، قالوا انك مشاركة بمسلسل «ع امل» لشركة «ايغل» بدور اساسي. شو فيكي تخبرينا شي عن دورك؟

- بقدر قلّك اني رح قدّم الشغلتين اللي بحبن كتير، التمثيل والغناء. دوري بنت اسما فرح وهي اسم ع مسمّى، وهي موسيقية، ورح تسمعوا صوتا عم بتغنّي بالمسلسل.

- خلينا نبقى بعالم الغناء، قالوا في قاسم مشترك بينك وبين خوليو. تنيناتكن انتقلتوا من كرة القدم للغناء من بعد اصابة بالإجر.

- إنو خوليو وين وانا وين؟ اللي صار انو لما كنت صغيرة كنت إلعب فوتبول، وارقص باليه بذات الوقت، وكانو يقولوا انو هيدا الشي ممنوع، بس أنا كنت «متيّسة» انو بدي اعملن سوا، الى أن… دفعت ثمنها وكسرت كاحلي للمرة التانية. وهيك ما عاد فيني ابقى بعالم الرياضة، فركّزت عالبيانو والسولفاج والفوكاليز، ومن هونيك بلشت الغرام بالموسيقى.

- قالوا انك مش بس مغرومة بالموسيقى والتمثيل، كمان غرامك تعملي مقالب بالناس.

- إنو حلو الواحد يعمل مقالب، it’s fun.

- والظاهر يا أم المقالب إنو إمك اكتر حدا بيعاني من مقالبك. صح؟

- مزبوط. عاملة كتير مقالب بعيلتي، وخصوصاً أمي. أمي معلمة عربي، وكانت تعلمني بصف البريفية، وانا طبعاً كنت كتير شيطانة. في مرة رفعت ايدي هي وعم تشرح الدرس. هي ترددت بالاول تسمحلي احكي، رجعت قالتلي بجدّية «نعم ماريلين؟»، سألتا «شو الغدا اليوم»؟ وطبعاً فرط الصف بالضحك وشحطتني من الصف، وبلشوا التلاميذ يقولولا «شو مدام؟ رح تبعتي ورا إمها»؟ وفي مرة كان طالع فيلتر جديد ع انستغرام ، بيشوّه الوج وبيكبّر الشفاف بطريقة بتضحّك. اخدت الصورة، وبعتّتا لأمي وقلتلا sorry mom بس أنا كتير طموحة ، وكرمال الفن والنجاح، لازم اعمل اي شي بيتطلّبو مني الدور، لهيك انا كبّرت شفافي. وصدّقت أمي وانهارِت، ويا ماريلين كيف بتعملي هيك؟ ما انتي متل القمر يا ماما.

- صحيح انتي متل القمر، لهيك امك سمّتك ماريلين؟ تيمّنا بماريلين مونرو؟

- لأ. متل ما قلتلك امي معلمة مدرسة، فلما كانت حبلة فيي وعرفت معها بنت، قررت تسميني على اسم اي تلميذة عندا بالصف آخدة أعلى علامة بالفحص. والحمدالله هالتلميذة كان اسما ماريلين مش شي تاني.


MISS 3