مرحبا جورج وhappy new year. شو ممكن بعد اتمنالك بالسنة الجديدة، طالما كلنا منقول إنك فنان شامل، أبدعت بكل شي عملتو: الكتابة، التمثيل، الاخراج، التلحين. بينك وبين حالك، أي موهبة بتعتبرها نقطة قوتك أكتر من غيرا؟
بهالمرحلة نقطة قوتي هي التمثيل، لأنو كل شي بكتبو أو بعملّو إخراج، ما بيزهِّر إذا ما كان في ممثل. هلأ التمثيل، بس بعدين، ما بعرف إذا قدراتي التمثيلية رح بتخفّ بسبب العمر، وبتقوى قدراتي الكتابية أو الإخراجية. بكرا منشوف.
طيب، عندك مواهب ما بيعرفها عنك الجمهور؟
يوجد. عندي مواهب موسيقية ورياضية. بلعب فوتبول وتنيس، وعندي هَوَس بمشاهدة الافلام والمسرحيات. مش بس كون عالمسرح وعالشاشة، بحب شاهد أعمال غيري.
عَ سيرة المسرح، قالوا انك نجحت بالتلفزيون والسينما، بس بتبقى خشبة المسرح نقطة ضعفك وقوتك. شو سرو للمسرح؟
سر المسرح يا صديقتي إنو، غير التفاعل المباشر اللي كلنا منعرف قيمتو، وإنو الناس جايي لعندك، قاصدتك، حاطة بنزين وحق البطاقة وحاطة من وقتا، وأهم شي حاطة ثقتها فيكي لتقدمي عمل بيرضي طموح مجيتها لعندك، فإنتي لازم تكوني أهل لهالثقة. سر المسرح إنو بيقدّس اللحظة التفاعلية بيننا وبين الناس، هيدي اللحظة الحقيقية اللي ما بيجي متلا، ولَو عم تعرضي العرض رقم 1000، ولو نفس الموقف ونفس النص. المسرح مراية ناصعة، بيقعد المشاهد بيتفرّج عَ حالو من خلالها بطاقات مباشرة عم تعطي بعضا. المسرح بيوحِّد المشاعر. حلو تسمعي الصالة باختلافاتها المناطقية والعقائدية والعمرية والثقافية، عم تضحك وتزقف وتبكي وتصغي مع بعضا. هيدا دليل انو القواسم المشتركة الانسانية هي هي، ما في شي بيجمعن قدّ المسرح.
مش معقول شو بتعشق المسرح، بتحكي عنو وما بتتوقّف. وعَ سيرة العشق، قالوا إنك مأضرب عن الزواج. الى متى؟
مَنّي مأضرب عن الزواج. بالعكس، أنا منفتح لأي شي ممكن يضيف على حياتي. أنا زلمي مغامِر بحياتي وبشغلي، فَ مَنّي ضد مغامرة الزواج. بس بنفس الوقت بحرص إني كون كافل المغامرة بنسبة معيّنة. ومغامرة الزواج مغامرة أبدية، الفشل فيها ممكن يئذي كتير حواليها، ومنهن الاولاد إذا صار في اولاد. لهيك أنا ناطر الشريكة المناسبة لحتى اقدر أعمل بيت حلو، وإلا أنا مش ناقصني شي.
انشالله تلاقي المرأة اللي ممكن تحبا قدّ المسرح وقد… البترون، لأنو قالوا انك بتروني قح. شو اكتر شي بتحبو بالبترون؟
بحب ناسها الطيبين والأوادم. الكل صاروا يعرفوا جمال البترون بحراً وجرداً ووسطاً، وآثاراتها وكنايسها القديمة واسواقها وطرقاتها الحلوة والاماكن السياحية الرائعة، بس اللي عم بيحبوه الناس اكتر شي بالبترون هني ناس البترون المحبين والمضيافين.هيدا اكتر شي بحبو فيها، غير إنو خلقت وربيت فيها، واصحابي ومدرستي وبيئتي ومجتمعي وذكرياتي الحلوة والمرّة فيها.
ع سيرة اصحابك ومجتمعك، كيف بتتواصل معن عادة، لأنو قالولنا انك الوحيد يمكن على الاراضي اللبنانية ما عندك واتساب. ليش مقاطع الواتساب؟
صحيح، ما عندي واتساب. ما عزتو وولا مرة حسّيت حالي إني بحاجة ماسة إلو. للصراحة عدم وجودو موفّر عليي كتير تواصل. أنا زلمي بحب أفصل حالي اوقات، وهيدا الشي بيساعدني إني انعزل الى حدٍّ ما. كيف بتتواصل مع الاهل والاصحاب؟ اللي بدو ياني بيدقلي، دخلِك كيف كنا نتواصل قبل الواتساب والسيلولير؟ الواتساب مسألة فينا نستغني عنها، هلأ أكيد بتهيّن الحياة، بعرف، بس بعد ما وصلت لمطرح حس أنا مخنوق ولازم ركّب واتساب. لمّا اوصل، احتمال حط واتساب.
