ألو، بونجورك نوال.
هااااي، كيفك يا حبيبي؟
بأحلى حالاتي، وانتي ما في احلى منك، مع إنن بيقولوا إنك ما لجأتي أبداً لأي تقنية تجميل. شو السبب؟
يمكن لأنو بحب كون unique؟ شيلِك من المزح، هيدي قناعة شخصية، وانا راضية عن شكلي وبحب لمّا إتطلع بالمراية أعرف حالي. وبما إني ممثلة، أنا بحاجة لكل تفصيل بوجّي يكون طبيعي ميّة بالميّة. هلأ ممكن إلجأ للبوتوكس اذا الدور بيتطلب مني كون أصغر بالعمر، لأنو البوتوكس ما بيدوم إلا كم شهر. بس بعد ما صارت.
قالوا إنو صوتك حلو، وبترقصي وبتمثلي حلو و… بترسمي كمان حلو. إيمتى وكيف خلقت هالموهبة عندك؟
بيّي كان طراش، وكان ياخدني أوقات معو عالشغل، فصرت حب ريحة الدهان والتينر. بس ما بحياتي كنت أعرف أرسم تفاحة جالسة. هالموهبة بلّشت بفترة الحجر بكورونا. شفت على يوتيوب رسام عم يرسم فحسّيت عبالي أعمل متلو. وبما إنو خيّي متخصص بكتابة الايقونات (رسمها) وعندو كل الأدوات، امسكت الريشة وبلّشت بهدف التسلية. وهيك اكتشفت شغفي بالرسم، وشوي شوي نمّيت هالموهبة وحالياً عندي 70 لوحة بين طبيعة و»بورتريه» وتجريدي، وشاركت بمعرض بالرعيّة وبعت 4 لوحات.
قالوا بتلبقلك أكتر الأدوار الكوميدية، مع إنك تفوقت بأدوار درامية متل بـ»5 ونص» و»للموت 2» لِ فزتي عنو بجائزة موريكس. لشو بتميلي أكتر؟
بالحياة اليومية في كل شي، ضحكة ودمعة. ما فينا نفصل، لأنو تركيبة الانسان مزيج من كل شي. بس أنا بطبعي إنسانة مرحة وعفوية، يمكن لهيك بيقولوا بتلبقلي الكوميديا.
للأسف بيقولوا إنو أدوار البطولة ما بتنعطى إلا للممثلات الشابات. شو رأيك؟
ما بيهمني دور البطولة، المهم الدور يعلّم ويكون حلو وفيه شغل. البطولة إنك تثبتي حالك بالدور، حتى لو كان تاني أو تالت.
قالوا إنك بتحلمي تمثلي شخصية حقيقية على الشاشة.
مزبوط
متل مين؟
يمكن لأنو صوتي حلو، بحب جسّد شخصية مطربة. سعاد محمد مثلاً، لأنها صوت لا يُعلى عليه، وكانوا يقارنوها بأم كلثوم، وأكيد حياتها فيها قصص كتيرة يتضوّى عليها.
أخيراً قالوا إنك مأضربة عن الزواج. خير؟
مش مأضربة، بس من شي 25 سنة قررت كرّس حالي لربّنا متل الراهبات. أنا بدوّر عالكمال بحياتي، وما لقيتو إلا عند يسوع. معو لقيت حب أسمى وسعادة أكتر وسلام داخلي. لهيك شلت فكرة الزواج من راسي، مع إنو العيلة مقدسة عندي.
